1Cor 16 | ASO | STEP | Idise mene Zudaia misubouko Izesu' zuho inite'ine nomivo vise' iga' ani' aleve nene hize ele' i-ngidi lingine moni di nubuho ilizangumu' gamazi ma loloze. Gililo: Galatia misubou' Izesu' zuho ti' lo lo-ngiduvodo' nene linginesi a'mine'mine ilo.

1 Corinthians 16

O'moso'mi Gono've Hize Ele' Ogakumu' Izesu' Evenele Zuho Moni Di Nubuho Ilizangumu' Nene Paulo' Lo-ngimine'

1 Idise mene Zudaia misubouko Izesu' zuho inite'ine nomivo vise' iga' ani' aleve nene hize ele' i-ngidi lingine moni di nubuho ilizangumu' gamazi ma loloze. Gililo: Galatia misubou' Izesu' zuho ti' lo lo-ngiduvodo' nene linginesi a'mine'mine ilo. 2 Lingine salele hamoli'mi lulou' nene moni inite' nanike' daa' nahe a'minguti' nene dani' votigilelo' gili mini Sadeu' Sadeu' nene ize' mili lingela mili ato' ika' ika' igi minilo. Ne'mine ami gopo nizavo naza vo hetelekuvo lingine gohi lihitehe' igi di lumo lumo ikelizaze. Ne'mine igi minilo. 3 Ne'mine igi nizavo naza linginela okuvo a'mine di nubuho igi milani' moni nene di vilizave ma di oti-ngidikevo engi' monovomukisi ido' viliza monovomukisi luhuvo gizo ngemekuvo di Zelusalemi numuda vilizave. 4 Ido' nenikisi nene ha volodo' o mineline' nene nazasi makato' ha volosune.

Paulo' Aza Kolidi Alevetida Volosa Line' Gamazi

5 Naza nene Makedonia misubouko voloni' o neinako a'mida volodoti' nene apase lengita alosuve. 6 Ido' lengita aloni' nene vo ninge-lengedo volosuve lo gelo lamuve. Lengikisi gamene ha'na gidini makato' minelesune lo gelo nouvoni' nene Guvelesi ve'mo gilido' noline' nene ha minelesune. Ne'mine lo giluvoni' nenako lengita ogo hetelekuvo makato' nonivo hepe' naba elaa' ine' gamene nesi ivile' o vilihe losa nogiluve. Ido' lengita aloni' nene ogo minosa ebe' mala volosa oloda nene lingine hize ele' i-nidi a'mine voloda nene aka'ne vili-nidilisave losa gele minosa alosuve. 8 Ne'mine lo nogiluvoni'za Eheso ebeta mene Guvelesi ve'mi gono've'mi gihile soto' iline' aka nene naba goloso ngolo' lo-nedavo a'mine gono nene noduvo monokumu' mehe'ine imi lovo i limaa' ave nene vai' goloso nizave. Nemu' nene a'mine gono naba nene do minelove lo ido' lovo i limaa' avete Izesu' evenele di gopo i-ngidikelizave lo lengi' nizada lite' lo vamo Eheso ebeta mene ha nouvo Zuda veti holise' gamene ma gulive Pedekosi nene aliteleseive.

10 Ido' Timoteo' nene naza Guvelesi ve'mi gono've gehaa' nouvoni' ne'mino nogihinaze. Kolidi aleve lengi' nizada novivo ma nene oko'nolo' gelalize. Gehe gehe izi imi gamazi laminekovo' li-imi minilo. 11 Ido' ezemu' nene haza ve ve li lingine ningi huli-damilo. Lengita navo ma hongu gamazivo' li-imi mini neni' nouvoda alingumu' ve li aka've vili-di imiselilo. Leze zuhosi mela eze alingumu' nene gizebo o none.

12 Ido' idise neve nene leze zuho Apolo'ni mamu' nene lolouve: Apolo'ni nene leze zuho lingesi lengita vilive lo geli gelinga lo-duvoni'za aza nene lulo a'mida vamivo amuzo molo vamolove lo lingine nizada nene vamive. Vaminako alinge' viline' aka lamine' ma soto' o-davo ma nene lengita vilive.

Paulo' Kolidi Aleve Geke' Lo-ngedo Luhuvo Gize Osu' Line' Gamazi

13 Inite' mali'mo lutine nene do goloso ogalize. Ehe' igi mini mono' nemu' gatine sita sata' gilami amuzo mili gili ele'vole' igivo' minilo. Ido' ele'vole' igi vemoho' lili' igi oti pehe li minilo. 14 Inite' igi mili ilizani' muki' nene haza igi mili ami nasahili' ido' mangi ido' lutine ngemaa' monovotidotikovo' nene igi mili minilo.

15 Neze zuhokizo lingine Setehano' zuho mamu' gili nizave. Ingine nene a'mine lengi' Akaia misubotingu' nene evene' muki' minanguti' engi' nene gomu' mili Izesuda vi gi'mizi eze evenele lili' igi Izesu' zuho linge ma hize ele' o-ngedaa' gono dalone li a'mine gonomu' lu'ine otavo di nizave. 16 Lingine a'mine'mine igi a'mine ne'mine vesi ido' engi' makato' gono amuzo mili daa' navesi gelekele' i-ngidi minilizave lo naza amuzo molo nolo-lingimuve.

17 Ido' vekise Setehano' ve Hotunato' ve ido' Akaiko' ve nene neni' nouvoda lingine mo amavo mulumo gele-lengedo nouvodo' ingine nenita igi hetelikevo mulu'neu' lamine' gelo nouve. 18 Ne'mini igi hetelani' ne'mo nene neni' mulu'neu' lamine' giluvo nite' dikevo lamine' goloso gelekuve. Ido' a'mine'mine ogo lengi' lutinesi nene di lamine' i-lingidi nizave. Nemu' ne'mine ve nene di naba i-ngidi di lamine' i-ngidilizave.

19 Ido' Asia misubouko mene Izesu' zuho mulise ato ato' nete nene lengikumu' geke' li-lingidi nizave. Ido' Akuila' ve elenaho Pilisikila' ve engi' numungu' di gese' igi mono' gilaa' ave ingine nene lengi' longopo'ni goloso nilavo noluve. 20 Ido' Eheso ebeta mene leze zuho nizani' netesi longopo'ni nilave. Ido' monoku' igi di nubo ilizani' nene O'moso'mi evenelelite ilizado' o minine' monovolo' igi ge mese' aseka lo-nede ne mese' aseka lo-gede li minilo.

21 Luhuvo mene gamazi noluvo ve mali'mo gize-nidine'za ido' longopo'ni lo luhuvo mene neni' Paulo' nene a'nedunu' nogizuve.

22 Ido' ve ma ingine hamo hamo' Guvelesi ve lu'ine imamilizave nene Guvelesi ve'mo usi' ize-ngidivoo lo noluve.

Ido' Guvekasi ve ano lo noluve.

23 Ido' Guvelesi ve Izesu' nasahili've nene lengita mine molo minivoo lo noluve.

24 Lengikisi nenikisi nene Izesu' Kilisito' evenele nounako nemu' ve lo lu'ne've nene lengi' lengeme nouve losa longopo'ni noluve. Luvoni' ne'mino miniliho. Moda a'nesi' ve.